Ahakoa i tuhia tēnei ki te reo Pākehā, he mea i pupū ake i taku riri i taku mātakitaki atu i te pakipūmeka, Gurrumul me te kūare o te nuinga o ngā kaiuiui i a ia. Kāore rātou i paku rangahau i ngā tikanga tūtakitaki i tētehi tangata nō tōna ake whenua, ā, he tino horokukū a Gurrumul ki te tuku i ngōna whakaaro ki tētehi tauhou. Ki taku nei titiro, kāore ngā kaiuiui i te mōhio ki tēnei mea te whakamānawa i te ahurea ake o te iwi taketake. Mō tātou te Māori, ka kawea atu ngā mahi i runga i te tika, te pono me te aroha, ā, ka whakatau te manuwhiri i te tuatahi. He mea nui te whakatū hui ki tētehi tauhou, ā, mā ngā tātou tikanga kē tātou hei ārahi, ahakoa ki whea.
He aha taku mana? He mana tuku iho nō ngā tūpuna! He aha taku reo? He mana tuku iho, he arero tūpuna! He aha taku mahi? He tauwhiro, he arataki i ngā tikanga a ngōku tūpuna e, ka tau! Ko Liana Poutu rāua ko Te Ingo Ngaia i Muru Raupatu Marae Waingōhia ana te whakaputa o tēnei whakaaraara i a au hei urupare atu i te kaupapa, “He aha tā te karanga ki te whakarauora i tō tātou Māoritanga?” Kia rāhuitia e au ki ngōna tino tirohanga e toru mō te wahine - kia toitū ai tō tātou ahurea Māori, ā, kia tōia ai te wahine i te kore, i te pō, ki te ao mārama. Ka tahi, ko tōu mana. Ka rua, ko tōu reo Māori. Ka tengi, ko ngō mahi. Ka wherawherahia ngēnei aronga hei upoko kōrero māku. Ko tōu mana Ko tā Raina Ferris: “Ko te reo tuatahi o te marae, nō te wahine. He mana tuku iho tēnei. Ko te reo tuatahi ki te tuitui i te muka tangata, i te ao kikokiko ki te ao wairua kia tau ai te noho a te iwi ki runga i te marae, nō te wahine. He mana tuku iho nō te tapu o te wahine.” ...